Kaupsamningur er haldinn þegar búið er að uppfylla alla fyrirvara í kauptilboði. Það getur verið allur gangur á því hversu langt er frá kauptilboði til kaupsamnings. Ef þetta eru keðjusölur þá geta verið 2-3 mánuðir frá því að fyrsta tilboðið er undirritað þar sem farið er í kaupsamning. Ef þetta er stök eign og kaupandi er jafnvel tilbúinn með greiðslumat er yfirleitt bókað í kaupsamning innan 2ja vikna.
Kaupsamningur á að endurspegla kauptilboðið og það er ekki hægt að gera breytingar á tilboðinu einhliða heldur verða báðir aðilar að samþykkja allar slíkar breytingar.
Í keðjusölum er mjög algengt að það þurfi að gera breytingar á greiðslutilhögun til að allar sölurnar gangi upp en ef þetta er stök eign þá þarf allt að standast eins og stafur á bók.
Þegar kaupandi mætir í kaupsamning þarf hann að passa að hann hafi nægar heimildir til að millifæra kaupsamningsgreiðsluna og kostnaðinn við kaupin. Það þarf að passa upp á stórgreiðslumörkin og að millifæra fyrir kl. 16:00. Yfirleitt er þægilegast að millifæra alla greiðsluna inn á vörslureikning fasteignasölunnar sem sér svo um að greiða áfram inn á seljanda eftir að búið er að undirrita kaupsamninginn.
Kaupsamningurinn fer síðan í þinglýsingu strax eftir kaupsamningsfund og það er gífurlega mikilvægt að passa það þar sem ef seljandi er t.d. í fjárhagsvandræðum er ekki hægt að þinglýsa fjárnámi á eignina ef það er kominn þinglýstur kaupsamningur. Þess vegna verður kaupandi alltaf að greiða þinglýsingarkostnaðinn samhliða kaupsamningi þannig að það sé hægt að gæta hans hagsmuna að fullu.
asdis@husaskjol.is- Sími: 863 0402
